ຄົນດີກິລາເດັ່ນ ຄວາມໄຝ່ຝັນ ຄືຕົ້ນກຳເນີດ ຄວາມສຳເລັດ ຂອງເຈົ້າຂອງ ຫລຽນທອງ ວູຊູ ງານເອຊຽນເກມ ຄັ້ງທີ 16 “ ປາລອຍ ບາກຄຳ ”

ທຸກໆຄົນ​ເກີດ​ມາ​ຢູ່​ໃນ​ສັງຄົມ​ໃດໜຶ່ງ ກໍ​ຄື​ໃນ​ໂລກ​ນີ້ ກໍ​ລ້ວນ​ແລ້ວ​ແຕ່​ມີ​ຄວາມ​​​ໄຝ່ຝັນ​ຂອງ​ໃຜ​ມັນ ບໍ່ວ່າ​ຈະ​ເປັນຄວາມ​​ໄຝ່ຝັນ​ຢາກ​ມີ​ຊີວິດ​ທີ່​ດີ, ຢາກ​ມີ​ຄວາມສຸກ, ຢາກ​ມີ​ວຽກ​ເຮັດ​ງານ​ທຳ​ທີ່ໝັ້ນຄົງ, ຢາກ​ມີ​ເງິນ​ມີ​ຄຳ​ລົ້ນ​ເຫລືອ ຕະຫລອດຮອດຢາກ​ມີ​ສຸຂະ ພາບ​ແຂງ​ແຮງ ​ແລະ ອື່ນໆ ​ແຕ່​ສິງ​ນັ້ນໆ ມັນ​ກໍ​ເປັນ​ພຽງຄວາມ​ຝັນ​ເທົ່າ​ນັ້ນ ​ເພາະ​ຄົນ​ສ່ວນ​ໃຫຍ່​ມີ​ແຕ່​ຝັນ​ບໍ່​ໄດ້​ອົດທົນ​ພະຍາຍາມ​ຜ່ານ​ຜ່າ​ອຸປະສັກ​ ແລະ ລົງມື​ປະຕິບັດ​ຕົວ​ຈິງ ໃນ​ການ ສ້າງ​ຄວາມ​ຝັນ​ຂອງ​ຕົນ​ເອງ​ໃຫ້​ເປັນ​ຈິງ ຂະນະ​ດຽວກັນ​ບາງ​ຄົນ​ກໍ​ພະຍາຍາມ​ແລ້ວ ພະຍາຍາມ​ອີກ ຢ່າງ​ເຕັ້ມທີ່ ​ແຕ່​ກໍ​ຍັງ​ບໍ່ສຳ​ເລັດ​ຕາມ​ເປົ້າ​ທີ່​ຕົນ​ຄາດ​ໄວ້ ​ເພາະ​ສະພາບ​ແວດ​ລ້ອມ ​ແລະ ​ໂຊກ​ບໍ່​ເຂົ້າ​ຂ້າງ. ທັງ​ນີ້ ທັງ​ນັ້ນ ​ກໍ​ຍັງ​​ບໍ່ຍອມ​ແພ້ຕັ້ງໜ້າອົດທົນ ​ແລະ ​ເອົາ​ໃຈ​ໃສ່ ຜ່ານ​ຜ່າ ຈົນ​​ໃນ​ທີ່​ສຸດ​ກໍປະສົບ​ຜົນສຳ​ເລັດ​ອັນສູງ​ສົ່ງ ​ເຊິ່ງ​ເຂົາ​ຄົນ​ນີ້ ກໍ​​ແມ່ນ: ນັກ​ກິລາ​ມວຍວູຊູ ສາວທີ​ມຊາດລາວ ຂອງ​ເຮົາ​ເອງຄື: ນາງ “ປາ​ລອຍ  ປັກ ກ່ຳ” ທີ່​ສາມາດ​ປະກາດ​ສັກດາ​ໂດຍ ການ​ຄວ້າ​ຫລຽນທອງ​ມາ​ຄອງຢ່າງ​ສົມ​ສັກ​ສີ ​ໃນ​ງານ​ກິລາ ​ເອຊຽນ ເກມ ຄັ້ງທີ 16 ທ້າຍ​ປີ 2010 ທີ່​ກວາງ​ໂຈ​ວ ສ.ປ ຈີນ. ນາງ “ປາ​ລອຍ ປັກ​ກ່ຳ” ​ເກີດ​ເມື່ອ​ວັນ​ທີ 1 ພຶດສະພາ ປີ 1990 ທີ່ ບ້ານ ​ໂພ​ໄຊ, ​ເມືອງ​ ປາກ​ຊັນ, ແຂວງບໍລິ​ຄຳ​ໄຊ, ປັດຈຸບັນ​ຢູ່ບ້ານ ​​ໂຊກ​ຄຳ, ​ເມືອງ​ໄຊ​ເສດ​ຖາ, ນະ​ຄອນ​ຫລວງ​ວຽງຈັນ, ເປັນ​ບຸດຂອງ​ພໍ່ ພອນ ປັກກ່ຳ (ເສຍຊີ ວິດແລ້ວ) ​ແລະ ​ແມ່ ເພັດ ປັກກ່ຳ ​ເຊິ່ງ ຂະນະ​ນີ້ ໄດ້​ປະກອບການຄ້າຂາຍ​ນຳ​ເອື້ອຍຂອງ​ຕົນ ພ້ອມຄຽງຄູ​່ກັບ​ການ​ຝຶກ​ຊ້ອມກິລາ​ມວຍ ວູຊູ ປະຈຳ. ສາວນ້ອຍ ປາ​ລອຍ ​ໄດ້​ກ້າວ​ເຂົ້າ​ມາ​ວົງ​ການກິລາມວຍ​ວູຊູ  ໄດ້ບໍ່ດົນ ເຊິ່ງ ເລີ່ມແຕ່ ເດືອນ ກຸມພາ ປີ 2009 ເປັນຕົ້ນມາ ໂດຍທຳອິດໄດ້ ເຫັນເດັກ ນ້ອຍຂ້າງບ້ານຝຶກຊ້ອມກິລາມວຍ ລາວ ແລະ ກໍຮູ້ສຶກວ່າມັກ ຢາກລອງ ຝຶກຊ້ອມເບິ່ງ ເພື່ອພັດທະນາຕົນເອງ ໃຫ້ກາຍເປັນ ນັກກິລາ ຢູ່ໃນແຖວໜ້າ ຂອງວົງການກິລາລາວ ຫລັງຈາກນັ້ນ ກໍໄດ້ກ້າວເຂົ້າໄປສະເໜີຕົວຝຶກຊ້ອມ ທີ່ຄ້າຍມວຍຈິດປະເສີດ (ໂຊກຄຳ) ເປັນເວລາ 2-3 ເດືອນ, ໃນຂະນະ ດຽວກັນ ທ່ານ ວັນໄຊ ອຸດົມຜົນ ຄູຝຶກ ມວຍວູຊູ ທີມຊາດລາວກໍໄດ້ສົນໃຈ ແລະ ນຳໄປຝຶກຊ້ອມກິລາ ມວຍວູຊູ ຢູ່ທີ່ ສູນຝຶກກິລາແຫ່ງຊາດ (ສີເກີດ) ພ້ອມນັ້ນ ເດືອນມິຖຸນາ-ກັນຍາ ກໍໄດ້ ໄປເກັບຕົວຝຶກຊ້ອມຢູ່ທີ່ ສ.ສ ຫວຽດ ນາມ, ແຕ່ກໍເປັນໜ້າເສຍດາຍທີ່ ງານມະຫາກຳກິລາຊີ ເກມ ຄັ້ງທີ 25 ປີ 2009 ບໍ່ໄດ້ເຂົ້າຮ່ວມແຂ່ງຂັນ ເນື່ອງຈາກຮ່າງກາຍຍັງບໍ່ພ້ອມ ທັງນີ້ ທັງນັ້ນ  ເຖິງແມ່ນວ່າ: ງານຊີ ເກມ ຄັ້ງທີ 25 ຈະບໍ່ໄດ້ເຂົ້າຮ່ວມ ແຂ່ງຂັນຕາມຈຸດປະສົງ ແລະ ເປົ້າໝາຍກໍຕາມ ແຕ່ ປາລອຍ ກໍຍັງບໍ່ໝົດ ຫວັງໃນການໄຝ່ຝັນ ທີ່ຈະເປັນນັກກິລາດີເດັ່ນ ໃນການຮັບໃຊ້ ຊາດຮັບໃຊ້ສັງຄົມລາວ,ຈຶ່ງໄດ້ຕັ້ງໜ້າຝຶກຊ້ອມກຽມຄວາມ ພ້ອມໃສ່ງານຕ່າງໆ ໃນທີ່ສຸດຄວາມຝັນກໍມາເຖິງ ເມື່ອໄດ້ມີຊື່ ເປັນໜຶ່ງໃນນັກກິລາທີ່ເຂົ້າຮ່ວມແຂ່ງຂັນ ໃນງານເອຊຽນ ເກມ ຄັ້ງທີ 16 ເດືອນ ພະຈິກ ປີ 2010, ຈາກນັ້ນ ປາລອຍ ກໍໄດ້ເລີ່ມຝຶກໜັກ ແລະ ກໍໄດ້ໄປເກັບຕົວຝຶກຊ້ອມ ຢູ່ທີ່ ສ.ປ ຈີນ ແຕ່ເດືອນ ສິງຫາ 2010 ເປັນເວລາ 3 ເດືອນກວ່າ. ການທີ່ໄດ້ເຂົ້າແຂ່ງຂັນໃນຕົວຈິງ ນັກກິລາສາວ ປາລອຍ ບໍ່ໄດ້ຕື່ນເຕັ້ນຕົກໃຈແຕ່ຢ່າງໃດ ເພາະພໍມີ ປະສົບການມາ ກ່ອນແລ້ວເຖິງຈະບໍ່ແມ່ນ ປະສົບການ ລະດັບໃຫຍ່ເທົ່າລາຍການນີ້ກໍຕາມແຕ່ມັນກໍ ຊ່ວຍໄດ້ດີສົມຄວນ ເຮັດໃຫ້ໃນນັດທຳອິດ ປາບ ນັກກິລາ ຈາກປະເທດເນປານ ໄດ້ສຳເລັດ 2-0 ຍົກ, ສ່ວນ ນັດທີ 2 ຮອບຮອງຊະນະເລີດ ມາເສຍໃຫ້ນັກກິລາຈາກປະເທດອິນເດຍ 1-2 ຍົກຢ່າງໜ້າເສຍດາຍ ແລະ ຄວ້າຫລຽນ ທອງມາຄອງຢ່າງສົມສັກສີ. ຈາກຜົນງານດັ່ງກ່າວນີ້ ກາຍເປັນຜົນສຳເລັດອັນສູງສົ່ງຂອງ ປາລອຍ ປັກກ່ຳ ໃນການໄຝ່ຝັນທີ່ຈະສ້າງ ກຽດ ແລະ ຊື່ສຽງໃຫ້ແກ່ປະເທດຊາດ ເຖິງແມ່ນວ່າ ຈະກ້າວເຂົ້າມາວົງການກິລາມວຍວູຊູ ພຽງແຕ່ບໍ່ ເທົ່າໃດປີເທົ່ານັ້ນ, ນອກຈາກນີ້ ປາລອຍ ຍັງໄດ້ເປັນໜຶ່ງໃນ 9 ຄົນ ທີ່ໄດ້ຮັບລາງວັນ ນັກກິລາດີເດັ່ນແຫ່ງປີ 2010 ອີກດ້ວຍ.

ໃນອະນາຄົດຕໍ່ໜ້າ ສາວນ້ອຍ ເຈົ້າຂອງຫລຽນທອງ ງານເອຊຽນ ເກມ ຄັ້ງທີ 16 ຍັງບໍ່ວາງມືຈາກວົງ ການຈະສືບຕໍ່ສ້າງຜົນງານໃຫ້ແກ່ປະເທດຊາດຕໍ່ໄປ ໂດຍສະເພາະໃນມະຫາກຳກິລາຊີເກມ ຄັ້ງທີ 26 ທ້າຍປີນີ້ ທີ່ຈາກາຕາ ປະເທດອິນໂດເນເຊຍ ພ້ອມກັບງານມະຫາກຳກິລາແຫ່ງຊາດ ຄັ້ງທີ 9 ທ້າຍປີນີ້ ທີ່ແຂວງຫລວງພະບາງເປັນເຈົ້າພາບ (ຖ້າໄດ້ບັນຈຸກິລາວູຊູໃນງານ).

​ໂດຍ: ດາວ​ໃໝ່

ຂ່າວທົ່ວໄປ ສະກຸບພິເສດ | Comments Off

Comments are closed.