ກອງປະຊຸມໃຫຍ່ ຄັ້ງທີ 8 ຂອງອົງຄະນະພັກກະຊວງສຶກສາທິການ ແລະ ກິລາ
ກອງປະຊຸມຜູ້ບໍລິຫານການສຶກສາ ແລະ ກິລາ ປະຈຳປີ 2016
ພິທີປິດ ງານມະຫະກຳກິລາ ນັກຮຽນມັດທະຍົມສຶກສາ ທົ່ວປະເທດ ຄັ້ງທີ 6 ທີ່ແຂວງບໍລິຄຳໄຊ ເປັນເຈົ້າພາບ
ງານມະຫະກຳກິລາມະຫາວິທະຍາໄລລາວ ຄັ້ງທີ I

ເຂົ້າສູ່ລະບົບ

      ເມື່ອວັນທີ 14 ສິງຫາ ຜ່ານມາ ທີ່ຮ້ານຈໍາໜ່າຍລົດຖີບ ສະຫະພັນລົດຖີບແຫ່ງຊາດລາວ ນະຄອນຫຼວງວຽງຈັນ ໄດ້ມີພິທີເຕົ້າໂຮມຄູເຝິກ ແລະ ທັບນັກກິລາລົດຖີບທີມຊາດລາວ ຊຸດກຽມຮ່ວມ ກົວລາລຳເປີ ເກມ 2017 ພາຍຫຼັງເດີນທາງກັບຈາກການເຂົ້າຮ່ວມແຂ່ງຂັນລົດຖີບ ໄທແລນ ໂອເພັນ 2017 ທີ່ແຂວງເລີຍ ປະເທດໄທ ເປັນເຈົ້າພາບ ເມື່ອບໍ່ດົນມານີ້ ໂດຍໃຫ້ກຽດເຂົ້າຮ່ວມ ແລະ ໂອ້ລົມນັກກິລາຂອງ ທ່ານ ລັດສະໝີ ສູນດາລາ ເລຂາທິການສະຫະພັນລົດຖີບແຫ່ງຊາດລາວ, ມີບັນດາຄະນະຄູເຝິກ ແລະ ນັກກິລາລົດຖີບທີມຊາດລາວ.

      ການແຂ່ງຂັນລົດຖີບທາງໄກ ໄລຍະທາງ 90 ກິໂລແມັດ ລາຍການ ໄທແລນ ໂອເພັນ ຄັ້ງນີ້ ມີນັກກິລາຈາກບັນດາສະໂມສອນຂອງປະເທດໄທ ເຂົ້າຮ່ວມ 70 ກວ່າຄົນ, ໃນນັ້ນ ມີບັນດານັກກິລາ 30 ຄົນຂອງໄທ ຊຸດຄັດເລືອກທີມຊາດໄທເຂົ້າຮ່ວມແຂ່ງຂັນງານກິລາຊີເກມ ທີ່ມາເລເຊຍ ສະເພາະສປປ ລາວ ສົ່ງນັກກິລາເຂົ້າຮ່ວມລ່າແຊ໋ມ 3 ຄົນ ປະກອບມີ ທ້າວ ສຸດທິສັກ ວັນດີລາ, ທ້າວ ອາລິຍາ ພູນສະຫວັດ ແລະ ທ້າວ ຖາວອນ ພົນອາສາ. ຜ່ານການແຂ່ງຂັນ ຜົນປາກົດວ່າ: ອາລິຍາ ພູນສະຫວັດ ນັກຖີບລົດມື 1 ລາວ ພາລົດຄູ່ໃຈເຂົ້າເສັ້ນໄຊເປັນອັນດັບ 1 ໜີຫ່າງອັນດັບ 2 ນັກກິລາລົດຖີບຈາກປະເທດໄທ ຂາດຮອຍ 1 ນາທີ 23 ວິນາທີ ຫຼື ສາມາດທຳສະຖິຕິຄະແນນລວມໄດ້ 2 ຊົວໂມງ 13 ນາທີ ຄວ້າແຊ໋ມລາຍການນີ້ໄປຄອງ.      

      ທ່ານ ບິນລີ້ ເດັດທິບົວ ຫົວໜ້າຄູເຝິກນັກກິລາລົດຖີບທີມຊາດລາວ ໃຫ້ສຳພາດວ່າ: ໃນການເຂົ້າຮ່ວມແຂ່ງຂັນກິລາລົດຖີບ ງານກິລາຊີເກມ ຄັ້ງນີ້, ສະຫະພັນກິລາລົດຖີບແຫ່ງຊາດລາວ ກຳນົດສົ່ງ 4 ນັກກິລາຖີບລົດທີ່ເກັ່ງທີ່ສຸດຕາງໜ້າ ສປປ ລາວ ເຂົ້າຮ່ວມແຂ່ງຂັນງານດັ່ງກ່າວ 4 ຄົນ ປະກອບມີ ທ້າວ ສຸດທິສັກ ວັນດີລາ, ທ້າວ ອາລິຍາ ພູນສະຫວັດ, ທ້າວ ຖາວອນ ພົນອາສາ ແລະ ທ້າວ ລຳເງິນ ວັນນະສຸກ ພ້ອມທັງມີການເກັບຕົວເຝິກຊ້ອມ ແລະ ເຂົ້າຮ່ວມແຂ່ງຂັນທັງພາຍໃນ ແລະ ຕ່າງປະເທດ ຢ່າງເປັນປົກກະຕິ, ເຊິ່ງສາມາດຕີລາໄດ້ວ່ານັກກິລາພວກເຮົາທຸກຄົນມີການພັດທະນາ ແລະ ສ້າງປະສົບການໃຫ້ຕົນເອງສູງ, ມີລະບຽບວິໄນ ແລະ ດູແລຮັກສາສຸຂະພາບໄດ້ດີ ໂດຍມາຮອດປັດຈຸບັນເຫັນວ່າມີຄວາມພ້ອມ 95 ເປີເຊັນ ເຫຼືອອີກ 5 ວັນ ກ່ອນເຂົ້າຮ່ວມແຂ່ງຂັນຊີເກມ ທີ່ມາເລເຊຍ ຈະສືບຕໍ່ໃຫ້ນັກກິລາເນັ້ນການເຝິກຊ້ອມແບບເບົ່າໆ ກຳນົດເສັ້ນ 4 ເມືອງໃນ ຫາ ເມືອງສັງທອງ ເຊື່ອວ່າ ຊີເກມປີນີ້ ນັກກິລາຖີບລົດລາວ ຈະກັບມາສ້າງຄວາມຍິ່ງໃຫຍ່ໃຫ້ທັບນັກກິລາລາວໄດ້ອີກຄັ້ງ.

      ຂະນະທີ່ ອາລິຍາ ພູນສະຫວັດ ເວົ້າວ່າ: ໃນເວລານີ້ ຕົນເອງມີຄວາມພ້ອມເຖິງ 95 ເປີເຊັນ ເຫຼືອນັ້ນຈະພະຍາຍາມເລັ່ງຄວາມຟິດໃນການເກັບຕົວເຝິກເຝິກຊ້ອມຢູ່ ນະຄອນຫຼວງວຽງຈັນ ໃຫ້ເຕັມ 100 ເປີເຊັນ ເພາະໃນ ກົວລາລຳເປີ ເກມ ມີພຽງ 5-6 ປະເທດເທົ່ານັ້ນ ທີ່ເປັນຄູ່ປັບແຕ່ຈະບໍ່ປະໝາດຢ່າງເດັດຂາດ ໂດຍພວກເຮົານັກກິລາທັງ 4 ຄົນ ຈະອາໃສທີມເວີກຮັກສາຄວາມສາມັກຄີ ບວກປະສົບການທີ່ຜ່ານຜ່າອຸປະສັກ ແລະ ຜົນງານແຊ໋ມ ໄທແລນ ໂອເພັນ ທີ່ໄດ້ມາ ຈະເປັນກຳລັງໃຈທີ່ດີໃນການລ່າຫຼຽນຄຳ ກົວລາລຳເປີ ເກມ ໃຫ້ທັບນັກກິລາລາວ.

      ການແຂ່ງຂັນກິລາລົດຖີບ ກົວລາລຳເປີ ເກມ 2017 ຈະມີການຊີງໄຊກັນທັງໝົດ 3 ລາຍການ ຄືປະເພດລົດຖີບທາງໄກ 140 ກິໂລແມັດ, ລົດຖີບຈັບເວລາທີມ ແລະ ລົດຖີບສະສົມຄະແນນ, ໃນນັ້ນ ທັບນັກກິລາລົດຖີບທີມຊາດລາວ ຈະລົງແຂ່ງຂັນ 2 ລາຍການ ຄື: ລົດຖີບທາງໄກ 140 ກິໂລແມັດ ແລະ ລົດຖີບຈັບເວລາທີມ. ສຳລັບທັບນັກກິລາລົດຖີບລາວ ແມ່ນຈະອອກເດີນທາງໄປຍັງນະຄອນຫຼວງກົວລາລຳເປີ ປະເທດມາເລເຊຍ ຢ່າງເປັນທາງການ ໃນວັນທີ 19 ສິງຫານີ້.

ໂດຍ ອ້ວນດຳ

ນສພ ສຶກສາ-ກິລາເດືອນຫຼ້າສຸດ

ວາລະສານກິລາ

ໂທລະພາບ

ວິທະຍຸ

ວິທະຍຸກິລາ
102.pngBeerlao_Prime_Minister's_Cup.pngLao toyota.pngf889234799e865bbe90cee71f6cd2e53_L.pngfooterslide7.png