ກອງປະຊຸມໃຫຍ່ ຄັ້ງທີ 8 ຂອງອົງຄະນະພັກກະຊວງສຶກສາທິການ ແລະ ກິລາ
ກອງປະຊຸມຜູ້ບໍລິຫານການສຶກສາ ແລະ ກິລາ ປະຈຳປີ 2016
ພິທີປິດ ງານມະຫະກຳກິລາ ນັກຮຽນມັດທະຍົມສຶກສາ ທົ່ວປະເທດ ຄັ້ງທີ 6 ທີ່ແຂວງບໍລິຄຳໄຊ ເປັນເຈົ້າພາບ
ງານມະຫະກຳກິລາມະຫາວິທະຍາໄລລາວ ຄັ້ງທີ I

ເຂົ້າສູ່ລະບົບ

      ໃນພິທີດັ່ງກ່າວ, ເລີ່ມດ້ວຍຂະບວນສວນສະໜາມກ້ອນກຳລັງທຸງຊາດມາເລເຊຍ ແລະ ທຸງກິລາໂອແລມປິກ, ທຸງກິລາຊີເກມ ແລະ ຂະບວນນັກກິລາ 11 ປະເທດ ໂດຍສປປ ລາວ ມີຄະນະນຳ, ຄູເຝິກ ແລະ ນັກກິລາ ຈຳນວນ 99 ຄົນ ຕາງໜ້າທັບນັກກິລາລາວ ເດີນສວນສະໜາມເປັນອັນດັບທີ 4 ຮອງຈາກປະເທດອິນໂດເນເຊຍ ໂດຍການຖືທຸງຂອງທ້າວ ຕາຫວານ ວັນລິວົງ ເຈົ້າຂອງຫຼຽນຄຳ ຊີເກມ ຄັ້ງທີ 27 ທີ່ປະເທດມຽນມາ ປີ 2013 ຈາກນັ້ນຕໍ່ດ້ວຍການສະແດງສິລະປະ-ວັນນະຄະດີຈາກນັກສະແດງຂອງຊາວມາເລເຊຍ ຢ່າງສຸດອາລັງການ. ສ່ວນຂັ້ນຕອນສຸດທ້າຍເຊິ່ງເປັນໄຮໄລໃນງານດັ່ງກ່າວ ກໍ່ໄດ້ມີການຈູດໄຟຄົບເພີງຈາກ ນາງ ເນີ ນາບີຕ້າ ຊາບຣີ ນັກກິລາໂດດນໍ້າດາວຮຸ່ງ ເຈົ້າຫຼຽນຄຳຊີເກມ 2 ສະໄໝ ເປັນຜູ້ເຫາະເຫີນຢູ່ກາງອາກາດລອຍຕົວໄປຈູດໄຟໃນອ່າງທວນໄຟໃຫຍ່ ກ່ອນຈະມີຟຸໄຟຊຸດໃຫຍ່ຊ່ອງປະກາຍຂຶ້ນເໜືອສະໜາມກິລາດັ່ງກ່າວ ເຊິ່ງໄດ້ສ້າງຄວາມຕື່ນຕາຕື່ນໃຈໃຫ້ຜູ້ຊົມໃນສະໜາມຢ່າງຄຶກຄັກ ໂດຍເປັນການປະກາດເປີດການແຂ່ງຂັນກິລາຊີເກມ 2017 ຢ່າງເປັນທາງການ ທີ່ປະເທດມາເລເຊຍ.

      ສຳລັບ ງານກິລາຊີເກມ ຄັ້ງນີ້ ມີ 11 ປະເທດ ເຂົ້າຮ່ວມແຂ່ງຂັນປະກອບມີ ສປປ ລາວ, ໄທ, ອິນໂດເນເຊຍ, ສິງກະໂປ, ຫວຽດນາມ, ຟີລິບປິນ, ບຣູໄນ, ຕີມໍ ເລສເຕ, ກຳປູເຈຍ, ມຽນມາ ແລະ ເຈົ້າພາບ ມາເລເຊຍ ຄາດວ່າມີນັກກິລາເກືອບ 5.000 ຄົນ ເຂົ້າຮ່ວມ ມີການຊີງໄຊກັນທັງໝົດ 404 ຫຼຽນຄໍາ ຈາກ 38 ປະເພດກິລາ. ສຳລັບ ສປປ ລາວ ກໍ່ຄື ກະຊວງ ສສກ ສົ່ງທັບນັກກິລາລາວ ຄະນະນຳ, ກຳມະການຕັດສິນ, ຄູເຝິກ ແລະ ນັກກິລາ ທັງໝົດ 350 ຄົນ, ໃນນັ້ນ ສະເພາະທັບນັກກິລາລາວມີ 221 ຄົນ ຈາກ 22 ປະເພດກິລາ ປະກອບ​ມີ:ປັນ​ຈັ​ສີ​ລັດ, ປິ່ງປ່ອງ, ມວຍ​ວູຊູ, ມວຍ​ສາກົນ, ມວຍ​ລາວ, ຍິງ​ທະນູ, ​ເປ​ຕັງ, ກະຕໍ້-ຊິນລອນ, ​ເທ​ຄວັນ​ໂດ, ​ແລ່ນ-ລານ, ​ເທັນ​ນິສ, ​ເຕະບານຊາຍ, ລອຍ​ນໍ້າ, ຣັກບີ້, ກາຣາ​ເຕ​ໂດ, ຢູ​ໂດ, ບິນລຽດ-ສະນຸກ​ເກີ, ຍິງ​ປືນ, ດອກ​ປີກ​ໄກ່, ບານບ້ວງ, ລົດຖີບ ​ແລະ ກິລາ​ກ໊ອຟ ພ້ອມຕັ້ງເປົ້າຈະສູ້ຊົນຍາດໃຫ້ໄດ້ຢ່າງໜ້ອຍ 3-5 ຫຼຽນຄຳ.

      ປັດຈຸບັນທັບນັກກິລາລາວ ລົງສະໜາມແຂ່ງຂັນສຳເລັດໄປແລ້ວ ກໍ່ມີກິລາກະຕໍ້ຊິນລອນ ເຊິ່ງສາມາດສ້າງຜົນງານຄວ້າ 1 ຫຼຽນເງິນ ແລະ 1 ຫຼຽນທອງ ໃຫ້ທັບນັກກິລາລາວ ຈັ້ງຢູ່ອັນດັບທີ 8 ຈາກ 11 ປະເທດເຂົ້າຮ່ວມ. ສ່ວນນຳໜ້າຕາຕະລາງຫຼຽນຄຳ ແມ່ນເຈົ້າພາບ ມາເລເຊຍ ຍາດໄດ້ 8 ຫຼຽນຄຳ. ຂະນະທີ່ກິລາປະເພດອື່ນໆ ກໍ່ເລີ່ມມີການແຂ່ງຂັນໃນວັນທີ 20 ສິງຫາ 2017 ທັບນັກກິລາລາວ ຈະລົງສະໜາມແຂ່ງຂັນກິລາວູຊູ, ຍິງທະນູ ແລະ ມວຍສາກົນ ສ່ວນໃນມື້ນີ້ (21 ສິງຫາ) ກໍ່ຈະມີກິລາເຕະບານ ລາວ ພົບກັບ ບຣູໄນ ໃນເວລາ 16:00 ໂມງ ຕາມເວລາທ້ອງຖິ່ນຂອງປະເທດມາເລເຊຍ ເຊິ່ງໄວກວ່າເວລາໃນ ລາວ 1 ຊົວໂມງ.

ໂດຍ ອ້ວນດຳ ລາຍງານຈາກປະເທດມາເລເຊຍ

 

ນສພ ສຶກສາ-ກິລາເດືອນຫຼ້າສຸດ

ວາລະສານກິລາ

ໂທລະພາບ

ວິທະຍຸ

ວິທະຍຸກິລາ
102.pngBeerlao_Prime_Minister's_Cup.pngLao toyota.pngf889234799e865bbe90cee71f6cd2e53_L.pngfooterslide7.png