ກອງປະຊຸມໃຫຍ່ ຄັ້ງທີ 8 ຂອງອົງຄະນະພັກກະຊວງສຶກສາທິການ ແລະ ກິລາ
ກອງປະຊຸມຜູ້ບໍລິຫານການສຶກສາ ແລະ ກິລາ ປະຈຳປີ 2016
ພິທີປິດ ງານມະຫະກຳກິລາ ນັກຮຽນມັດທະຍົມສຶກສາ ທົ່ວປະເທດ ຄັ້ງທີ 6 ທີ່ແຂວງບໍລິຄຳໄຊ ເປັນເຈົ້າພາບ
ງານມະຫະກຳກິລາມະຫາວິທະຍາໄລລາວ ຄັ້ງທີ I

ເຂົ້າສູ່ລະບົບ

      ໃນຕອນເຊົ້າວັນທີ 5 ກັນຍາ ຜ່ານມາ ທີ່ສຳນັກງານນາຍົກລັດຖະມົນຕີ, ໄດ້ມີພິທີໂອ້ລົມຂອງພະນະທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງສປປ ລາວ, ໂດຍມີ ທ່ານ ນາງ ແສງເດືອນ ຫຼ້າຈັນທະບູນ ລັດຖະມົນຕີກະຊວງສຶກສາທິການ ແລະ ກິລາ (ສສກ) ທັງເປັນປະທານຄະນະກຳມະການໂອແລມປີກແຫ່ງຊາດ ແລະ ທ່ານ ບົວລານ ສິລິປັນຍາ ຮອງລັດຖະມົນຕີ ກະຊວງ ສສກ, ຮອງປະທານ ຄະນະກຳມະການໂອແລມປິກແຫ່ງຊາດ ພ້ອມດ້ວຍຜູ້ຊ່ວຍລັດຖະມົນຕີ, ບັນດາຫົວໜ້າກົມ ແລະ ປະທານສະຫະພັນກິລາແຫ່ງຊາດ ຕະຫຼອດຮອດຄູເຝິກ ແລະ ນັກກິລາ ຊຸດສ້າງຜົນງານຄວ້າ 2 ຫຼຽນຄຳ, 3 ຫຼຽນເງິນ ແລະ 21 ຫຼຽນທອງ ໃນກົວລາລຳເປີ ເກມ.

      ໂອກາດນີ້, ທ່ານນາຍົກລັດຖະມົນຕີ ໄດ້ສະແດງຄວາມຍ້ອງຍໍຊົມເຊີຍຕໍ່ຄະນະນຳ, ຄູເຝິກ ແລະ ທັບນັກກິລາລາວ ຕະຫຼອດຜູ້ໃຫ້ການສະໜັບສະໜູນທີ່ຕັ້ງໜ້າເອົາໃຈໃສ່ປະຕິບັດພາລະກິດໜ້າທີ່ຂອງຊາດຢ່າງສຸດອົກສຸດໃຈ ສາມາດສ້າງຜົນງານ 2 ຫຼຽນຄຳ, 3 ຫຼຽນເງິນ ແລະ 21 ຫຼຽນທອງ ໃນກົວລາລຳເປີ ເກມ ສ້າງກຽດ ແລະ ຊື່ສຽງໃຫ້ແກ່ປະເທດຊາດ. ສະນັ້ນ, ເພື່ອຮັບປະກັນຜົນສຳເລັດໃນຕໍ່ໜ້າທີ່ ພັກ-ລັດ ມອບໝາຍໃຫ້ ແລະ ສ້າງຄວາມໝັ້ນໃຈຕໍ່ປະຊາຊົນຊາວລາວ ທັງພາຍໃນ ແລະ ຕ່າງປະເທດ ທີ່ໄດ້ຕິດຕາມການເຄື່ອນໄຫວຂອງທັບນັກກິລາລາວຢ່າງຈົດຈໍ່ ໂດຍສະເພາະການຫ້າງຫາກະກຽມເຂົ້າຮ່ວມຊີເກມ ໃນຕໍ່ໜ້າ ຕະຫຼອດຮອດລະດັບສາກົນ ຕ້ອງເພີ່ມທະວີເຊີດຊູນໍ້າໃຈຮັກຊາດ ສືບຕໍ່ປົກປັກຮັກສາກຽດຊື່ສຽງຂອງຊາດລາວ, ສຸມທຸກກຳລັງກາຍ, ກຳລັງໃຈ, ກຳລັງຊັບ, ຄວາມຮູ້ຄວາມສາມາດ, ສະຕິປັນຍາ, ຄວາມເສຍສະຫຼະຄົ້ນຄວ້າທິດສະດີຕາມຕຳລາ, ຕັ້ງໃຈເຝິກແອບ ແລະ ຖືເອົາບົດຮຽນ ໃນກົວລາລຳເປີ ເກມ ເປັນຈຸດສຸມແກ້ໄຂໃຫ້ລະອຽດ ເພື່ອເຮັດໃຫ້ການພັດທະນາກິລາລາວ ໄດ້ຮັບຜົນສຳເລັດຕາມຄາດໝາຍ ແລະ ຖ້າຢາກບັນລຸຄາດໝາຍຄືແນວນັ້ນ ຕ້ອງປະຕິບັດໃຫ້ໄດ້ 10 ປັດໄຈ ເປັນຕົ້ນຕໍ ແນໃສ່ສ້າງຜົນງານສຳເລັດ ໃນງານມະຫາກໍາກິລາຊີເກມ ຄັ້ງທີ 30 ທີ່ປະເທດຟີລິບປິນ ເປັນເຈົ້າພາບ ໃນປີ 2019.

      ສຳລັບ 10 ປັດໄຈດັ່ງກ່າວ ປະກອບມີ: 1. ໃຫ້ກົມວິຊາການກິລາ, ຄະນະກຳມະການໂອແລມປິກແຫ່ງຊາດ ຮ່ວມກັບບັນດາສະຫະພັນກິລາປະເພດຕ່າງໆ ຈັດກອງປະຊຸມວິຊາການຕີລາຄາຄືນຈຸດດີ, ຈຸດອ່ອນ ແລະ ຂໍ້ຄົງຄ້າງ ໃນກົວລາລຳເປີ ເກມ 2017 ວ່າເປັນຫຍັງຈຶ່ງບໍ່ປະສົບຜົນສຳເລັດ ແລະ ຊອກໃຫ້ເຫັນໄດ້ວິທີການພັດທະນາກິລາລາວໃຫ້ສູງຂຶ້ນກວ່າເກົ່າ; 2. ໃນຕໍ່ໜ້າການເກັບຕົວນັກກິລາ ກໍ່ຕ້ອງໃຫ້ເກັບຕົວແບບຍາວນານ ແລະ ຕໍ່ເນື່ອງກວ່າຄັ້ງນີ້ ເພື່ອສາມາດພັດທະນາກິລາໄດ້ຢ່າງຮອບດ້ານ ໂດຍຈະຕ້ອງຕອບສະໜອງດ້ານງົບປະມານຢ່າງເໝາະສົມ; 3. ຕ້ອງມີການຄັດເລືອກປະເພດກິລາ ແລະ ນັກກິລາທີ່ເປັນບຸລິມະສິດ ເພື່ອຈະຍາດເອົາຫຼຽນ ຕ້ອງລົງເລິກຕື່ມກັບສະຫະພັນກິລາແຫ່ງຊາດເປົ້າໝາຍ ແຕ່ຫົວທີເຮັດຢ່າງກວ້າງຂວາງ ແລະ ມີວິທະຍາສາດ; 4. ຕ້ອງມີການລົງທຶນຈ້າງຄູເຝິກດີເດັ່ນທີ່ມີປະສົບການຈາກຕ່າງປະເທດ ມາຊ່ວຍເຝິກແອບກິລາບາງປະເພດໃຫ້ມີສັກກະຍະພາບດີ ແລະ ຕໍ່ເນື່ອງ; 5. ຕ້ອງມີການລົງທຶນ ສົ່ງນັກກິລາບາງປະເພດເປົ້າໝາຍ ໄປເຝິກແອບຢູ່ຕ່າງປະເທດ ເພື່ອຊອກຫາປະສົບການດ້ວຍຫຼາຍຮູບແບບ ທັງຮູບແບບການຮ່ວມມື ແລະ ຮູບແບບໃຊ້ງົບປະມານລັດ.

6. ຕ້ອງເອົາໃຈໃສ່ຄັດເລືອກສ້າງບຸຄະລາກອນວິຊາການ ຢູ່ພາຍໃນດ້ວຍຫຼາຍຮູບແບບ ໂດຍສະເພາະແມ່ນເລັ່ງໃສ່ສ້າງຄູເຝິກກິລາລາວໃຫ້ສູງຂຶ້ນ ກາຍເປັນຜະລິດຕະພັນຂອງລາວ ທີ່ມີລະດັບສາກົນ; 7. ວາງແຜນສ້າງກຳມະການຕັດສິນຂອງລາວ ໃຫ້ຫຼາຍປະເພດໄດ້ຮັບການຍົກລະດັບ ແລະ ຮັບຮອງຈາກອາຊຽນ, ເອເຊຍ ແລະ ສາກົນ ເພື່ອສາມາດເຂົ້າຮ່ວມຈັດການແຂ່ງຂັນ ແລະ ຕັດສິນໃນລະດັບຕ່າງໆຫຼາຍຂຶ້ນ ເຊິ່ງຈະເປັນແມ່ແຮງໃຫ້ທັບນັກກິລາວ ໃນເວລາເຂົ້າຮ່ວມແຂ່ງຂັນ; 8. ປັບປຸງກົງຈັກການຈັດຕັ້ງຂອງບາງສະຫະພັນກິລາແຫ່ງຊາດ ທີ່ຍັງບໍ່ທັນເຂັ້ມແຂງ ເພື່ອຊອກກຳລັງແຮງທາງດ້ານທຶນຮອນ, ຄວາມສາມາດ ແລະ ສະຕິປັນຍາຊ່ວຍການຈັດຕັ້ງປະຕິບັດ; 9. ກົມວິຊາການທີ່ກ່ຽວຂ້ອງ ຕ້ອງຮ່ວມມືກັບສະຫະພັນກິລາປະເພດຕ່າງໆ ໃນການວາງແຜນເຂົ້າຮ່ວມຊີເກມ ຄັ້ງຕໍ່ໄປໄວ້ແຕ່ເນີ້ນໆ; 10. ໃຫ້ສະເໜີແຜນການດ່ວນຜ່ານຂັ້ນເທິງແຕ່ຫົວທີ ພ້ອມທັງຍາດແຍ່ງເອົາການຮ່ວມມື ແລະ ຊ່ວຍເຫຼືອດ້ານຕ່າງໆ ບໍ່ວ່າຈະເປັນດ້ານເຕັກນິກຈາກສາກົນ ແລະ ປະເທດເພື່ອນມິດໃຫ້ຫຼາຍຂຶ້ນ.

ພ້ອມນັ້ນ, ໃນພິທີ ພະນະທ່ານ ທອງລຸນ ສີສຸລິດ ຍັງໄດ້ມອບເງິນສ່ວນຕົວ ຈຳນວນ 100 ລ້ານກີບ ຊຸກຍູ້ນໍ້າໃຈໃຫ້ທັບນັກກິລາລາວ ຜູ້ທີ່ສາມາດຍາດໄດ້ຫຼຽນລາງວັນ. ໃນນັ້ນ, ຫຼຽນຄຳ 14 ລ້ານກີບ, ຫຼຽນເງິນ 10 ລ້ານກີບ ແລະ ຫຼຽນທອງ 2 ລ້ານກີບ.

ຂ່າວໂດຍ: ອ້ວນດຳ

ນສພ ສຶກສາ-ກິລາເດືອນຫຼ້າສຸດ

ວາລະສານກິລາ

ໂທລະພາບ

ວິທະຍຸ

ວິທະຍຸກິລາ
102.pngBeerlao_Prime_Minister's_Cup.pngLao toyota.pngf889234799e865bbe90cee71f6cd2e53_L.pngfooterslide7.png