ກອງປະຊຸມໃຫຍ່ ຄັ້ງທີ 8 ຂອງອົງຄະນະພັກກະຊວງສຶກສາທິການ ແລະ ກິລາ
ກອງປະຊຸມຜູ້ບໍລິຫານການສຶກສາ ແລະ ກິລາ ປະຈຳປີ 2016
ພິທີປິດ ງານມະຫະກຳກິລາ ນັກຮຽນມັດທະຍົມສຶກສາ ທົ່ວປະເທດ ຄັ້ງທີ 6 ທີ່ແຂວງບໍລິຄຳໄຊ ເປັນເຈົ້າພາບ
ງານມະຫະກຳກິລາມະຫາວິທະຍາໄລລາວ ຄັ້ງທີ I

ເຂົ້າສູ່ລະບົບ

       ວັນຄູແຫ່ງຊາດ (ວັນທີ 7 ຕຸລາ) ປີ 2017 ນີ້ ເປັນປີທີ່ມີຄວາມໝາຍສໍາຄັນຍິ່ງ ເພາະເປັນປີທີ 2 ທີ່ທົ່ວພັກ, ທົ່ວລັດ ແລະ ທົ່ວປວງຊົນລາວທັງຊາດ ພ້ອມກັນຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ 10 ຂອງພັກ ແລະ ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີຄັ້ງທີ 8 (2016 – 2020) ໂດຍສະເພາະແມ່ນການຈັດຕັ້ງຜັນຂະຫຍາຍມະຕິກອງປະຊຸມຄົບຄະນະຄັ້ງທີ 3, 4 ແລະ ຄັ້ງທີ 5​ ສະໄໝທີ 10 ຂອງພັກ ແລະ ຈັດຕັ້ງປະຕິບັດປະຕິບັດແຜນພັດທະນາເສດຖະກິດ - ສັງຄົມປີ 2017 ໃຫ້ເຂົ້າສູ່ລວງເລິກ ແລະ ເປັນຂະບວນຟົດຟື້ນ.

       ຕະຫຼອດໄລຍະທີ່ຜ່ານມາ, ພັກ ແລະ ລັດຖະບານ ເວລາໃດກໍ່ໃຫ້ຄວາມສໍາຄັນ ແລະ ເອົາໃຈໃສ່ຕໍ່ວຽກງານການສຶກສາຄູ ແລະ ຖືເອົາຄູສອນເປັນຂອດຕົ້ນຕໍ ແລະ ສໍາຄັນກວ່າໝູ່ໃນການຕັດສິນຄຸນະພາບຂອງການສຶກສາ ກໍ່ຄືການພັດທະນາຊັບພະຍາກອນມະນຸດ/ພັດທະນາຄົນ ຄົນເປັນປັດໃຈຕັດສິນໃນການພັດທະນາສ້າງສາປະເທດຊາດ. ຖືເອົາຊັບພະຍາກອນມະນຸດເປັນປັດໃຈຕັດສິນກໍາລັງການຜະລິດ, ຖືເອົາຄົນເປັນເປົ້າໝາຍ ແລະ ຈຸດສຸມຂອງການພັດທະນາ ແລະ ໄດ້ໃຫ້ນາມມະຍົດແກ່ຄູ ວ່າ: ຄູເປັນຄົນຂອງພັກ, ຄູ ແມ່ນແມ່ພິມຂອງຊາດ, ຄູແມ່ນວິສາວະກອນແຫ່ງດວງວິນຍານ, ຄູເປັນຜູ້ໃຫ້ຄວາມຮູ້. ທຸກຄົນຢູ່ໃນສັງຄົມມີຄວາມຮູ້ຍ້ອນມີຄູສອນ, ທຸກຄົນລ້ວນແລ້ວແຕ່ມີຄູສອນເປັນຂອງຕົນເອງ ແລະ ກໍ່ບໍ່ມີໃຜຈະປະຕິເສດບຸນຄຸນຂອງຄູ-ອາຈານສອນທີ່ໃຫ້ຄວາມຮູ້ແກ່ຕົນເອງ.

     ໃນໄລຍະ 23 ປີທີ່ຜ່ານມາ, ເຖິງວ່າ ສປປ ລາວພວກເຮົາໄດ້ປະສົບກັບສະພາບບັນຫາຫຼາຍດ້ານ ນັບທັງດ້ານຕັ້ງໜ້າ ແລະ ດ້ານຫຍໍ້ທໍ້, ​ເຊິ່ງໄດ້ສົ່ງຜົນກະທົບໂດຍກົງຕໍ່ຊີວິດການເປັນຢູ່ຂອງຖັນແຖວຄູ-ອາຈານ ແຕ່ດ້ວຍນະໂຍບາຍອັນຖືກຕ້ອງຂອງພັກ, ດ້ວຍມູນເຊື້ອດຸໝັ່ນ, ພາກພຽນ ແລະ ມານະອົດທົນຕໍ່ການປະຕິບັດໜ້າທີ່ການສອນຂອງຕົນ ທັງໄດ້ປະກອບສ່ວນຢ່າງໃຫຍ່ຫຼວງເຂົ້າໃນພາລະກິດປົກປັກຮັກສາ ແລະ ພັດທະນາປະເທດຊາດ ໂດຍສະເພາະແມ່ນການປະກອບສ່ວນດ້ວຍຄວາມຮັບຜິດຊອບທີ່ເປັນເຈົ້າການໃນການກໍ່ສ້າງ ແລະ ພັດທະນາຊັບພະຍາກອນມະນຸດ/ພັດທະນາຄົນ. ຄູ-ອາຈານຫຼາຍໆຄົນກາຍເປັນຄູສອນດີ-ສອນເກັ່ງ, ກາຍເປັນຄູຊ່ຽວຊານ, ຄູປະສົບການ, ຄູຊໍານານງານ ທັງມີສະຖານະພາບ ແລະ ມີບົດບາດສູງຂຶ້ນໃນສັງຄົມ. ຕາງໜ້າໃຫ້ການນໍາຂອງພັກ ແລະ ລັດຖະບານ, ຂ້າພະເຈົ້າ ຂໍສະແດງຄວາມກະຕັນຍູ, ຮູ້ບຸນຄຸນ ແລະ ຍ້ອງຍໍຊົມເຊີຍຄຸນງາມຄວາມດີຂອງຄູ-ອາຈານທີ່ໄດ້ອຸດທິດເຫື່ອແຮງ ແລະ ສະຕິປັນຍາຂອງຕົນປະກອບສ່ວນເຂົ້າໃນການພັດທະນາສ້າງສາປະເທດຊາດ. ພ້ອມກັນນີ້, ກໍ່ຂໍສະແດງຄວາມຂອບໃຈມາຍັງທຸກພາກສ່ວນໃນທົ່ວສັງຄົມ ທີ່ໄດ້ມີສ່ວນຮ່ວມ ແລະ ໃຫ້ການຊ່ວຍເຫຼືອຄູ - ອາຈານໃຫ້ມີຄຸນະພາບດີຂຶ້ນເປັນກ້າວໆ. ພັກ ແລະ ລັດຖະບານ ຕີລາຄາສູງຕໍ່ຜົນງານການປະກອບສ່ວນຂອງຄູ-ອາຈານ ເຂົ້າໃນການພັດທະນາເສດຖະກິດ-ສັງຄົມຂອງປະເທດ ໂດຍສະເພາະແມ່ນກໍ່ສ້າງ ແລະ ການພັດທະນາຊັບພະຍາກອນມະນຸດ/ພັດທະນາຄົນ ນັບແຕ່ຊັ້ນເດັກກ່ອນໄວຮຽນ ຈົນຮອດມະຫາວິທະຍາໄລ ໃຫ້ນັບມື້ນັບມີຄູນະພາບທີ່ສູງຂຶ້ນ.

- ບັນດາຄູ - ອາຈານ ແລະ ພີ່ນ້ອງຮ່ວມຊາດທີ່ຮັກແພງທັງຫຼາຍ

     ຄືດັ່ງທີ່ພວກເຮົາຮຸ້ນໍາກັນແລ້ວວ່າ ຍຸກປັດຈຸບັນ ແມ່ນຍຸກເທັກໂນໂລຢີທີ່ທັນສະໄໝ, ຍຸກເສດຖະກິດແຫ່ງພູມປັນຍາ ແລະ ຍຸກແຫ່ງການເຊື່ອມໂຍງເຂົ້າຫາກັນ. ພ້ອມດຽວກັນນີ້, ສະພາບແວດລ້ອມຂອງພາກພຶ້ນ ແລະ ສາກົນ ຍັງຈະສືບຕໍ່ຜັນແປໄປຢ່າງສະຫຼັບສັບຊ້ອນ ລວມທັງການປ່ຽນແປງຂອງດິນຟ້າອາກາດ, ໄພພິບັດທໍາມະຊາດ ແລະ ພະຍາດລະບາດຕ່າງໆ. ສະພາບແວດລ້ອມ ແລະ ການປ່ຽນແປງດັ່ງກ່າວ, ກໍ່ຈະມີທັງ ກາລະໂອກາດ ທີ່ເອື້ອອໍານວຍ, ມີທັງຂໍ້ຫຍຸ້ງຍາກ ແລະ ສິ່ງທ້າທາຍທົດສອບນາໆປະການຕໍ່ການພັດທະນາເສດຖະກິດ-ສັງຄົມ ກໍ່ຄື ຕໍ່ການພັດທະນາຊັບພະຍາກອນມະນຸດຢູ່ປະເທດເຮົາ. ໃນພຶດຕິກໍາຕົວຈິງ ໃນໂລກນີ້ໄດ້ຊີ້ບອກ ໃຫ້ພວກເຮົາ ເຫັນແລ້ວວ່າ ໃນການພັດທະນາປະເທດໃຫ້ຮຸ່ງເຮືອງຈະເລີນຍ່ອມມີຄວາມຮຽກຮ້ອງຕ້ອງການຊັບພະຍາກອນມະນຸດ (ຄົນ) ທີ່ມີຄຸນະພາບ. ສະນັ້ນ, ມັນເລັ່ງທວງໃຫ້ຄູ-ອາຈານຕ້ອງເພີ່ມທະວີຄວາມຮັບຜິດ ຊອບໃນການ ປະຕິບັດ ໜ້າທີ່ການສອນຂອງຕົນໃຫ້ສູງຂຶ້ນ.

       ເພື່ອບັນລຸເປົ້າໝາຍດັ່ງກ່າວ, ບໍ່ມີສິ່ງໃດໝົດນອກຈາກຄູ-ອາຈານຈະຕັ້ງໜ້າ​ເຝິກຝົນຫຼໍ່ຫຼອມ ແລະ ພັດທະນາຕົນເອງໃຫ້ກ້າວຂຶ້ນທັນກັບຍຸກສະໄໝ ໂດຍສະເພາະແມ່ນພັດທະນາວິທີການສິດສອນ, ການຄົ້ນຄວ້າ ວິໄຈ ທາງດ້ານວິທະຍາສາດ ແລະ ອື່ນໆ. ວິທີການສິດສອນຂອງຄູແມ່ນຂອດສໍາຄັນຫຼາຍ, ແມ່ນຫຼັກການ, ວິທີການຖ່າຍໂອນຄວາມຮູ້ຈາກຜູ້ຮູ້ໄປສູ່ຜູ້ບໍ່ຮູ້. ສະນັ້ນ, ຄູ - ອາຈານຕ້ອງມີຈັນຍາບັນ, ມີຄວາມເປັນແບບຢ່າງທີ່ດີໃຫ້ແກ່ຜູ້ຮຽນ ແລະ ສັງຄົມ, ມີຄວາມຮັບຜິດຊອບຕໍ່ການສິດສອນ, ສິດສອນຕາມຫຼັກສູດທີ່ຕົນເອງໄດ້ຮັບຜິດຊອບ ແລະ ມີຄວາມໂປ່ງໄສຕໍ່ການສິດສອນ.

       ຄູຕ້ອງພັດທະນາວິທີການສິດສອນຂອງຕົນຢ່າງຫຼາກຫຼາຍວິທີ, ບໍ່ມີວິທີການສິດສອນໃດທີ່ດີເປັນຫຼັກການຕາຍຕົວ ນອກຈາກການສິດສອນທີ່ເຮັດໃຫ້ຜູ້ຮຽນມີຄວາມຮູ້ທີ່ໄດ້ກໍານົດໄວ້ໃນຫຼັກສູດຂອງຊັ້ນຮຽນນັ້ນໆ ທັງສາມາດນຳເອົາຄວາມຮູ້ທີ່ໄດ້ຈາກການສອນຂອງຄູນັ້ນໄປນໍາໃຊ້ໄດ້ໃນພາກປະຕິບັດຕົວຈິງ, ສາມາດສ້າງງານດ້ວຍຕົນເອງ ແລະ ແກ້ໄຂບັນຫາດ້ວຍຕົນເອງໄດ້.

     ເພື່ອເຮັດໃຫ້ຄູ-ອາຈານ ໄດ້ພັດທະນາຕົນເອງໃຫ້ດີຂຶ້ນ ແລະ ປະຕິບັດໜ້າທີ່ການສິດສອນໄດ້ຢ່າງເຕັມທີ່ ຮຽກຮ້ອງໃຫ້ອົງການຈັດຕັ້ງທັງພາກລັດ ແລະ ພາກເອກະຊົນ ທັງພາຍໃນ ແລະ ຕ່າງປະເທດ ແລະ ທຸກພາກສ່ວນໃນສັງຄົມ ຈົ່ງພ້ອມກັນສ້າງເງື່ອນໄຂ ແລະ ເອື້ອອໍານວຍຄວາມສະດວກດ້ານຕ່າງໆໃຫ້ແກ່ເຂົາເຈົ້າໄດ້ຮັບຕາມນະໂຍບາຍທີ່ກໍານົດໃນລະບຽບກົດໝາຍເປັນຕົ້ນ ການຕອບສະໜອງເງິນເດືອນ, ເງິນນະໂຍບາຍຕ່າງໆ ໃຫ້ທັນເວລາ ນອກຈາກນັ້ນ, ແມ່ນການສະໜອງທີ່ພັກພາອາໄສຕາມຄວາມເໝາະສົມ ໂດຍສະເພາະແມ່ນຜູ້ຢູ່ເຂດຊົນເຜົ່າ, ເຂດຊົນນະບົດ, ຫ່າງໄກສອກຫຼີກ.

       ສຸດທ້າຍນີ້, ຕາງໜ້າໃຫ້ການນໍາພັກ ແລະ ລັດຖະບານ ຂ້າພະເຈົ້າຂໍອວຍພອນໄຊອັນປະເສີດມາຍັງບັນດາເພື່ອນໆຄູ-ອາຈານສອນ ທັງຍິງ ແລະ ຊາຍ ຕະຫຼອດຮອດປະຊາຊົນລາວບັນດາເຜົ່າ ຈົ່ງມີສຸຂະພາບເຂັ້ມແຂງ, ມີພາລະນາໄມສົມບູນ, ມີຄວາມສຸກຄວາມຈະເລີນ ແລະ ປະສົບຜົນສຳເລັດໃນການປະຕິບັດໜ້າທີ່ວຽກງານຂອງຕົນ.       

ນໍ້າໃຈວັນຄູແຫ່ງຊາດ 7 ຕຸລາ ໝັ້ນຍືນ

ຂໍຂອບໃຈ

ນສພ ສຶກສາ-ກິລາເດືອນຫຼ້າສຸດ

ວາລະສານກິລາ

ໂທລະພາບ

ວິທະຍຸ

ວິທະຍຸກິລາ
102.pngBeerlao_Prime_Minister's_Cup.pngLao toyota.pngf889234799e865bbe90cee71f6cd2e53_L.pngfooterslide7.png