ກອງປະຊຸມໃຫຍ່ ຄັ້ງທີ 8 ຂອງອົງຄະນະພັກກະຊວງສຶກສາທິການ ແລະ ກິລາ
ກອງປະຊຸມຜູ້ບໍລິຫານການສຶກສາ ແລະ ກິລາ ປະຈຳປີ 2016
ພິທີປິດ ງານມະຫະກຳກິລາ ນັກຮຽນມັດທະຍົມສຶກສາ ທົ່ວປະເທດ ຄັ້ງທີ 6 ທີ່ແຂວງບໍລິຄຳໄຊ ເປັນເຈົ້າພາບ
ງານມະຫະກຳກິລາມະຫາວິທະຍາໄລລາວ ຄັ້ງທີ I

school         ໂຮງຮຽນ ມັດທະຍົມຕອນຕົ້ນ (ມ ຕົ້ນ) ບ້ານນາລານ ເມືອງປະຊຸມພອນ ​ແຂວງ​ຈຳປາ​ສັກ ໄດ້ຮັບອາຄານຮຽນຫຼັງໃໝ່ ຈາກໂຄງການມູນນິທິເພື່ອພັດທະນາການສຶກສາສົງ ລວມມູນຄ່າການກໍ່ສ້າງທັງໝົດ 160 ລ້ານກວ່າກີບ.

ພິທີ​ມອບ-​ຮັບ ອາຄານ​ຮຽນດັ່ງກ່າວ, ​ໄດ້​ມີ​ຂຶ້ນເມື່ອທ້າຍອາທິດຜ່ານມາ ທີ່ໂຮງຮຽນ ມັດທະຍົມຕອນຕົ້ນ ບ້ານນາລານ ເມືອງປະຊຸມພອນ ​ແຂວງ​ຈຳປາ​ສັກ, ​ໂດຍ​ໃຫ້ກຽດມອບ​ຂອງພະອາຈານ ອຸດົມສັກ ແກ້ວພັນທະວົງ ຮອງຜູ້ອໍານວຍການວິທະຍາໄລສົງ ຈໍາປາສັກ,ຜູ້ຮັບຜິດຊອບໂຄງການມູນນິທິເພື່ອພັດທະນາການສຶກສາສົງ ພາຍຫຼັງປະກອບສ່ວນກໍ່ສ້າງຕໍ່ເຕີມສໍາເລັດແລະຕາງໜ້າກ່າວຮັບຂອງທ່ານ ນາງ ຄໍາມອນ ຊາມຸນຕີ ຫົວໜ້າຄະນະຈັດຕັ້ງເມືອງ ພ້ອມ​ທັງ​ໄດ້​ມອບ​ຕໍ່​ໃຫ້ອໍານາດການປົກຄອງບ້ານ ແລະ ຄູ-ອາຈານ ບ້ານນາລານເປັນຜູ້ຄຸ້ມຄອງນໍາໃຊ້ໃຫ້ມີຜົນປະໂຫຍດສູງສຸດໃນການຮຽນ-ການສອນລູກຫຼານ, ໂດຍໃຫ້ກຽດເຂົ້າຮ່ວມຂອງທ່ານ ບົວລິນ ວົງພະຈັນ ຮອງເຈົ້າແຂວງຈໍາປາສັກ, ທ່ານສຸລິວັນສະຫວັດທະສິນ ເຈົ້າເມືອງປາກເຊ, ທ່ານ ນາງ ຄໍາມອນ ຊາມຸນຕີ ຫົວໜ້າຄະນະຈັດຕັ້ງເມືອງ, ທ່ານ ພະອາຈານ ປູ່ເຟືອນ ວົງຄໍາຊາວ ປະທານອົງການ​ພຸດທະສາສະໜາ (ອພສ) ເມືອງປະທຸມພອນ, ພ້ອມດ້ວຍຕາງໜ້າຈາກ​ພາກສ່ວນ​ຕ່າງໆທີ່​ກ່ຽວຂ້ອງ​ເຂົ້າ​ຮ່ວມຢ່າງພ້ອມພຽງ.

ໃນພິທີດັ່ງກ່າວ, ທ່ານ ຄໍາຕູ້ ອຸ່ນມະນີຮອງນາຍບ້ານນາລານ ໄດ້ຜ່ານບົດສະຫຼຸບການກໍ່ສ້າງອາຄານຮຽນ ມ ຕົ້ນ ບ້ານນາລານໃຫ້ຮູ້ວ່າ: ອາຄານຮຽນດັ່ງກ່າວ ແມ່ນໄດ້ເລີ່ມລົງມືກໍ່ສ້າງແຕ່ປີ 2006 ໂດຍອາໄສການລະດົມທຶນຮອນຈາກພໍ່-ແມ່ປະຊາຊົນພາຍໃນບ້ານປະກອບສ່ວນ 50 ລ້ານກີບ, ຂໍໄມ້ຮັບໃຊ້ການກໍ່ສ້າງຈາກພາກລັດ 20 ແມັດກ້ອນ, ທ່ານ ບຸນໜັກ ເຄື່ອນສົມບັດນັກທຸລະກິດ ປະກອບສ່ວນ 47 ລ້ານກີບ, ໂຄງການສົ່ງເສີມການອ່ານ ແລະ ກຽມປະຖົມ ຫຼືເອແອັກຊົງປະກອບສ່ວນ 7,5 ລ້ານກີບ, ຈໍານວນໜຶ່ງກໍ່ໄດ້ປະກອບປູນຊີເມັນ ແລະ ການກໍ່ສ້າງໄດ້ສໍາເລັດປະມານ 70 ເປີເຊັນເລີຍ​ໄດ້ຢຸດຕິ​ໄປ​ໄລຍະໜຶ່ງ ເພາະງົບປະມານບໍ່ພຽງພໍ. ມາຮອດປີ 2016 ພະອາຈານ ອຸດົມສັກ ແກ້ວພັນທະວົງ, ເຊິ່ງເປັນລູກຫຼານຂອງພໍ່-ແມ່ປະຊາຊົນ ບ້ານນາລານໄດ້ລະດົມທຶນຮອນຈາກນັກທຸລະກິດ, ຜູ້ປະກອບການ ທັງພາກລັດ ແລະ ເອກະຊົນ, ບຸກຄົນ ແລະ ນິຕິບຸກຄົນ ລວມມູນຄ່າ 57 ລ້ານກີບມາປະກອບສ່ວນຊ່ວຍເຫຼືອກໍ່ສ້າງຕໍ່ເຕີມ ໂດຍເລີ່ມກໍ່ສ້າງແຕ່ເດືອນພຶດສະພາ ຫາ ​ເດືອນສິງຫາ 2016 ຈຶ່ງສໍາເລັດ.

 ສໍາລັບອາຄານຮຽນດັ່ງກ່າວ ແມ່ນເປັນອາຄານຊັ້ນດຽວ, ວ້າງ 8 ແມັດ, ຍາວ 50 ແມັດ, ຫຼັງຄາມຸງດ້ວຍກະເບື້ອງ, ຝາກໍ່ດ້ວຍຊີເມັນ, ພື້ນເທດ້ວຍເບຕົງເສີມເຫຼັກ, ມີ 5 ຫ້ອງ.ໃນນັ້ນ, ຫ້ອງຮຽນ 4 ຫ້ອງ, ຫ້ອງຄູ-ອາຈານ 1 ຫ້ອງລວມມູນຄ່າການກໍ່ສ້າງທັງໝົດ 160 ລ້ານກວ່າກີບ.

ໃນຕອນທ້າຍ, ທ່ານ ບົວລິນ ວົງພະຈັນ ກໍ່ໄດ້ຍົກໃຫ້ທຸກພາກສ່ວນຮັບຮູ້ເຂົ້າໃຈຕໍ່ຄວາມໝາຍສໍາຄັນຂອງວຽກງານການສຶກສາກໍ່ຄືການພັດທະນາຊັບພະຍາກອນມະນຸດ ແລະ ພັດທະນາລູກຫຼານໃຫ້ມີຄວາມຮູ້ຄວາມສາມາດເພື່ອເປັນຜູ້ສືບທີ່ດີຂອງພັກ-ລັດໃນອະນາຄົດ.ນອກຈາກນັ້ນ, ທ່ານກໍ່ໄດ້ໃຫ້ກຽດເຂົ້າຮ່ວມຕັດແຖບຜ້າເພື່ອເປັນນິມິດໝາຍອັນດີຕໍ່ພິທີມອບ-ຮັບອາຄານຮຽນ ມ ຕົ້ນ ດັ່ງກ່າວ.

ຂ່າວ-ພາບ: ທູນທອງໃຈ (ຈໍາປາໃໝ່)

ນສພ ສຶກສາ-ກິລາເດືອນຫຼ້າສຸດ

ວາລະສານກິລາ

ໂທລະພາບ

ວິທະຍຸ

ວິທະຍຸກິລາ
102.pngBeerlao_Prime_Minister's_Cup.pngLao toyota.pngf889234799e865bbe90cee71f6cd2e53_L.pngfooterslide7.png