ກອງປະຊຸມໃຫຍ່ ຄັ້ງທີ 8 ຂອງອົງຄະນະພັກກະຊວງສຶກສາທິການ ແລະ ກິລາ
ກອງປະຊຸມຜູ້ບໍລິຫານການສຶກສາ ແລະ ກິລາ ປະຈຳປີ 2016
ພິທີປິດ ງານມະຫະກຳກິລາ ນັກຮຽນມັດທະຍົມສຶກສາ ທົ່ວປະເທດ ຄັ້ງທີ 6 ທີ່ແຂວງບໍລິຄຳໄຊ ເປັນເຈົ້າພາບ
ງານມະຫະກຳກິລາມະຫາວິທະຍາໄລລາວ ຄັ້ງທີ I

madamm       ລັດຖະມົນຕີ ກະຊວງສຶກສາທິການ ແລະ ກິລາ ​ໄດ້ເນັ້ນໜັກໃຫ້ວິທະຍາໄລ (ວ.ລ) ຄູຫຼວງພະບາງ ກະກຽມຄວາມພ້ອມສຳລັບການປະກັນຄຸນະພາບຈາກພາຍນອກ ເພື່ອເປັນເງື່ອນໄຂໃນການພິຈາລະນາໃຫ້ເປີດສອນຫຼັກສູດປະລິນຍາຕີໄດ້ ແລະ ກ້າວສູ່ການຍົກລະດັບເປັນສະຖາບັນໃນອະນາຄົດ.

ເມື່ອວັນທີ 17 ກຸມພາ ຜ່ານມາ, ທ່ານ ນາງ ແສງເດືອນ ຫຼ້າຈັນທະບູນ ກຳມະການສູນກາງພັກ, ລັດຖະມົນຕີ ກະຊວງສຶກສາທິການ ແລະ ກິລາ ພ້ອມດ້ວຍຄະນະ ໄດ້ລົງໄປຢ້ຽມຢາມຄະນະພັກ, ຄະນະຜູ້ບໍລິຫານ, ພະນັກງານ ຄູ-ອາຈານ ແລະ ນັກສຶກສາ ວິທະຍາໄລ ຄູຫຼວງພະບາງ, ​ໂດຍ​ມີທ່ານ ບຸນສຸວັນ ລັດຕະນາ ຜູ້ອຳນວຍການວິທະຍາໄລ ຄູຫຼວງພະບາງ​ໃຫ້ການ​ຕ້ອນຮັບ.

ໂອກາດດັ່ງກ່າວ, ທ່ານ ບຸນສຸວັນ ລັດຕະນາ ໄດ້ລາຍງານໂດຍຫຍໍ້ກ່ຽວກັບສະພາບການຈັດຕັ້ງປະຕິບັດການຮຽນ-ການສອນພາຍໃນວິທະຍາໄລ ວ່າ:   ວິທະຍາໄລ ຄູຫຼວງພະບາງ ເປັນໜຶ່ງໃນບັນດາວິທະຍາໄລຄູໃນທົ່ວປະເທດ ທີ່ມີໜ້າທີ່ຈັດຕັ້ງປະຕິບັດແນວທາງການສຶກສາແຫ່ງຊາດຂອງພັກ, ໄດ້ເຮັດໜ້າທີ່ໃນການກໍ່ສ້າງຄູໃຫ້ແກ່ 3 ແຂວງພາກເໜືອ ຄື: ແຂວງຫຼວງພະບາງ, ແຂວງອຸດົມໄຊ ແລະ ແຂວງໄຊຍະບູລີ ໂດຍມີຫຼັກສູດການຮຽນ-ການສອນກໍ່ສ້າງຄູອະນຸບານ ແລະ ຄູປະຖົມ ລະບົບ 9+3,12+2,12+4 ແລະ 12+2+2 ແລະ ມີຫຼັກສູດກໍ່ສ້າງຄູມັດທະຍົມ ລະບົບ 12+2 ມີສາຂາວິຊາພາສາລາວ-ວັນນະຄະດີ, ວິທະຍາສາດສັງຄົມ, ສາພາຝຣັ່ງ, ອັງກິດ, ຟິຊິກສາດ, ຄະນິດສາດ, ເຄມີສາດ, ວິທະຍາສາດ ແລະ ໄອຊີທີ. ສໍາລັບສົກຮຽນນີ້, ມີພະນັກງານຄູ-ອາຈານທັງໝົດ 170 ຄົນ, ຍິງ 88 ຄົນ, ມີນັກສຶກສາທັງໝົດ 1.387 ຄົນ, ຍິງ 911 ຄົນ.  

ຜ່ານການຈັດຕັ້ງປະຕິບັດຫຼັກສູດການຮຽນ-ການສອນໃນການກໍ່ສ້າງຄູລະບົບຕ່າງໆ ແມ່ນສຳເລັດຕາມແຜນທີ່ວາງໄວ້ ໂດຍໄດ້ເລີ່ມເຂົ້າຮຽນເປັນປົກກະຕິແຕ່ວັນທີ 19 ກັນຍາ ແລະ ເປີດສົກຮຽນຢ່າງເປັນທາງການ ໃນວັນທີ 7 ຕຸລາ 2016, ປັດຈຸບັນກຳລັງດຳເນີນການຮຽນ-ການສອນພາກຮຽນທີ 2.  ສຳລັບນັກສຶກສາປີ 1 ແມ່ນກຳລັງຮຽນວິຊາປ້ອງກັນຊາດ-ປ້ອງກັນຄວາມສະຫງົບ. ນອກຈາກ, ການຈັດຕັ້ງການຮຽນ-ການສອນແລ້ວ ທາງວິທະຍາໄລຍັງໄດ້ສຳເລັດການປັບປຸງວິໄສທັດ ຄື: “ສ້າງວິຊາຊີບຄູສູ່ຄວາມເປັນເລີດ ປະເສີດດ້ວຍຄຸນນະທຳ ສົ່ງເສີມວັດທະນາທຳທີ່ເປັນເອກກະລັກ ພັດທະນາສິ່ງແວດລ້ອມ ສ້າງຄວາມພ້ອມກ້າວສູ່ສາກົນ”;​ໄດ້ສຳເລັດການເປັນເຈົ້າພາບຈັດງານແຂ່ງຂັນກິລານັກສຶກສາວິຊາຊີບ 10 ສະຖາບັນການສຶກສາຊັ້ນສູງທົ່ວແຂວງຫຼວງພະບາງ ຄັ້ງທີ 5. ນອກນັ້ນ, ຍັງສຳເລັດການພົວພັນເຊັນ MOU ກັບພາຍນອກ; ຈັດສົ່ງນັກສຶກສາ ຈຳນວນ 599 ຄົນ ໄປເຝິກຫັດທີ່ເມືອງວຽງຄຳ, ເມືອງປາກອູ, ເມືອງຊຽງເງິນ ແລະ ເມືອງຫຼວງພະບາງ ແລະ ວຽກງານອື່ນໆຫຼາຍດ້ານ. ຄຽງຄູ່ກັບຜົນສຳເລັດນັ້ນ ກໍ່ຍັງມີສິ່ງທ້າທາຍຫຼາຍດ້ານ ​ເປັນ​ຕົ້ນ​ແມ່ນ ຄວາມຮູ້ຄວາມສາມາດບຸຄະລາກອນ ແລະ ຄູສອນບາງດ້ານຍັງບໍ່ທັນສູງ ແລະ ພື້ນຖານໂຄງລ້າງກໍ່ຍັງບໍ່ທັນສາມາດຕອບສະໜອງໄດ້ ຕາມຄວາມຮຽກຮຽກຕ້ອງການ.

ຂະນະ​ດຽວກັນນີ້, ທ່ານລັດຖະມົນຕີ ກະຊວງສຶກສາທິການ ແລະ ກິລາ ກໍ່ໄດ້ນຳເອົາຄວາມຢ້ຽມຢາມຖາມຂ່າວ, ຄວາມສາມັກຄີຮັກແພງຢ່າງສະໜິດສະໜົມຈາກການນຳກະຊວງ ແລະ ໃນນາມສ່ວນຕົວມາສູ່ບັນດາຜູ້ບໍລິຫານການສຶກສາ, ພະນັກງານ-ຄູອາຈານ ແລະ ນັກສຶກສາທົ່ວວິທະຍາໄລຄູຫຼວງພະບາງ ພ້ອມທັງສະແດງຄວາມຊົມເຊີຍເປັນຢ່າງສູງຕໍ່ທຸກພາກສ່ວນທີ່ໄດ້ມີຄວາມພະຍາຍາມ, ມີຄວາມອົດທົນຕໍ່ໜ້າທີ່ວຽກງານຈົນເຮັດໃຫ້ວຽກງານການສ້າງຄູປະສົບຜົນສຳເລັດຫຼາຍດ້ານ ເຖິງແມ່ນວ່າການຈັດຕັ້ງປະຕິບັດຈະມີຂໍຈຳກັດຫຼາຍດ້ານກໍ່ຕາມ.

ແຕ່ແນວໃດກໍ່ຕາມ, ທ່ານລັດຖະມົນຕີ ຍັງໄດ້ເນັ້ນໜັກໃຫ້ຄະນະພັກ, ຜູ້ບໍລິຫານ ແລະພະນັກງານຄູ-ອາຈານ ວິທະຍາໄລ ຄູຫຼວງພະບາງ ເອົາໃຈໃສ່ແບບແຜນວິທີເຮັດວຽກ, ເພີ່ມທະວີການເຕົ້າໂຮມຄວາມສາມັກຄີພາຍໃນ, ເອົາໃຈໃສ່ວຽກງານອົບຮົມແນວຄິດເປັນປົກກະຕິ, ກຳໃຫ້ໄດ້ແນວຄິດຈິດໃຈ ແລະ ຄວາມມຸ່ງມາດປາຖະໜາຂອງພະນັກງານ-ຄູອາຈານ, ຊອກໃຫ້ເຫັນຜູ້ທີ່ພົ້ນເດັ່ນໃນຂະບວນການ ເພື່ອສ້າງເປັນເປົ້າໝາຍ ແລະ ບໍາລຸງກໍ່ສ້າງເປັນພະນັກງານສືບທອດໃນອະນາຄົດຢ່າງມີແຜນການ ແລະ ມີຄາດໝາຍຢ່າງຄັກແນ່. ພ້ອມທັງກະກຽມຄວາມພ້ອມສຳລັບການປະກັນຄຸນະພາບພາຍນອກ ເພື່ອເປັນເງື່ອນໄຂ ໃນການພິຈາລະນາໃຫ້ເປີດສອນຫຼັກສູດປະລິນຍາຕີໄດ້ ແລະ ກ້າວສູ່ການຍົກຖານະຂຶ້ນເປັນສະຖາບັນໃນອະນາຄົດ ເພາະກະຊວງສຶກສາທິການ ແລະ ກິລາ ມີທິດທາງຈະປັບປຸງການຈັດຕັ້ງຂອງວິທະຍາໄລຄູຄືນໃໝ່ ເພື່ອຮອງຮັບໃຫ້ແຕ່ລະແຫ່ງມີການພັດທະນາຕົນເອງກ້າວໄປສູ່ຄວາມເປັນເລີດ. ນອກຈາກນັ້ນ,ທ່ານລັດຖະມົນຕີ ຍັງໄດ້ເນັ້ນຕື່ມອີກວ່າ: ຕ້ອງເອົາໃຈໃສ່ໃນການຊິດສອນ, ການປົກປັກຮັກສາອາຄານສະຖານທີ່, ການຄຸ້ມຄອງພາຫະນະ ແລະ ໃຫ້ມີການສ້າງແຜນຈັດຕັ້ງປະຕິບັດວຽກງານຈຸດສຸມຕາມແຜນ 8.

ນອກຈາກ​ນີ້, ໃນໂອກາດທີ່ໄປຢ້ຽມຢາມ ວິທະຍາໄລດັ່ງກ່າວ, ທາງຄະນະນຳກະຊວງສຶກສາທິການ ແລະ ກິລາ ກໍ່ໄດ້ນຳເອົາອຸປະກອນການສຶກສາ ແລະ ກິລາ ຈຳນວນໜຶ່ງໄປມອບໃຫ້ເພື່ອເປັນການປະກອບເຂົ້າໃນການຮຽນການ-ການສອນ ​ເພື່ອເຮັດໃຫ້ວິທະຍາໄລມີການພັດທະນາຂຶ້ນໄປ​ເລື້ອຍໆ ​ແນ​ໃສ່ຕອບສະໜອງໄດ້ໃນວຽກງານພັດທະນາຄູ.

madamm1

ໂດຍ: ປາກກາໃຕ້.

ນສພ ສຶກສາ-ກິລາເດືອນຫຼ້າສຸດ

ວາລະສານກິລາ

ໂທລະພາບ

ວິທະຍຸ

ວິທະຍຸກິລາ
102.pngBeerlao_Prime_Minister's_Cup.pngLao toyota.pngf889234799e865bbe90cee71f6cd2e53_L.pngfooterslide7.png