ກອງປະຊຸມໃຫຍ່ ຄັ້ງທີ 8 ຂອງອົງຄະນະພັກກະຊວງສຶກສາທິການ ແລະ ກິລາ
ກອງປະຊຸມຜູ້ບໍລິຫານການສຶກສາ ແລະ ກິລາ ປະຈຳປີ 2016
ພິທີປິດ ງານມະຫະກຳກິລາ ນັກຮຽນມັດທະຍົມສຶກສາ ທົ່ວປະເທດ ຄັ້ງທີ 6 ທີ່ແຂວງບໍລິຄຳໄຊ ເປັນເຈົ້າພາບ
ງານມະຫະກຳກິລາມະຫາວິທະຍາໄລລາວ ຄັ້ງທີ I

ປະທານຄອລ       ທ່ານ ນາງ ​ແສງ​ເດືອນ ຫຼ້າ​ຈັນທະ​ບູນ ລັດຖະມົນຕີ ກະຊວງ​ສຶກສາ​ທິການ ​ແລະ ກິລາ (ສສກ) ໄດ້ຮັບການແຕ່ງຕັ້ງໃຫ້ເປັນປະທານ​ຄະນະ​ກຳມະການ​​ໂອ​ແລມປິກ​ແຫ່ງ​ຊາດ​ລາວ ​(ຄອລ) ຄົນ​ໃໝ່ ພ້ອມ ໃຫ້ຄຳໝັ້ນສັນຍາ​ຈະ​ທຸ້ມ​ເທ​​ທັງ​ເຫື່ອ​ແຮງ ​ແລະ ສະຕິ​ປັນຍາ ສຸມ​ໃສ່​ສົ່ງ​ເສີມ​​​ແຜນ​ພັດທະນາ​ກິລາ​ລາວ ຢ່າງຮອບດ້ານ ​ແນ​ໃສ່​ບັນລຸ​ເປົ້າ​ໝາຍການ​ພັດທະນາ​ຂະ​ບວນການກິລາ​ລາວ ​ໃຫ້​ມີ​ການ​ເຕີບ​​ໃຫຍ່​ຂະຫຍາຍຕົວ​ດີ​ຂຶ້ນກວ່າ​ເກົ່າ ​ເພື່ອ​ສ້າງນັກກິລາລາວ ກ້າວສູ່ຄວາມສຳເລັດ ໃນ​ງານ​ມະຫາ​ກຳ​ກິລາ​​ໂອ​ແລມປິກ ໃນ​ຕໍ່ໜ້າ.

           ​ເມື່ອ​ຕອນ​ເຊົ້າ​ວັນ​ທີ 27 ຕຸລາ ຜ່ານ​ມາ ທີ່​ຫ້ອງການ​ ຄອລ (ຂ້າງ​ສະໜາມກິລາ​ເຈົ້າ​ອາ​ນຸວົງ) ​ນະຄອນຫຼວງ​ວຽງ​ຈັນ, ​ໄດ້​ມີ​ກອງ​ປະຊຸມ​ວິສາມັນຂອງຄະນະບໍລິຫານງານ ຄອລ ​​ເພື່ອ​ປະກາດ​ຄະນະ​ບໍລິຫານ​ງານ ຄອລ ຊຸດໃໝ່ ແລະ  ພິທີ​ເປີດ​ຕົວ​ກອງ​ທຶນ​ສົ່ງ​ເສີມ​ກິລາ​ລາວ ​ສູ່​ໂອ​ແລມປິກສາກົນ, ໂດຍ​ພາຍ​ໃຕ້​ການ​ເປັນ​ປະທານ​ຂອງ ທ່ານ ນາງ ​​ແສງ​ເດືອນ ຫຼ້າ​ຈັນທະ​ບູນ, ທັງ​ເປັນ​ປະທານ ​ຄອລ ຄົນ​ໃໝ່, ມີ ທ່ານ ບົວ​ລານ ສິລິ​ປັນຍາ ຮອງ​ລັດຖະມົນຕີ ກະຊວງ ສສກ, ອະ​ດີດ​ຮັກສາ​ການ​ປະທານ ຄອລ ພ້ອມ​ດ້ວຍ​ບັນດາ​​ຄະນະ​ບໍລິຫານ​ງານ​ສະຫະພັນ​ກິລາ​ແຫ່ງ​ຊາດ, ​ແຂກ​ທີ່ຖືກ​ເຊີນ ຕະຫຼອດ​ຮອດ​ພະນັກງານ-ວິຊາ​ການ ທີ່​ກ່ຽວຂ້ອງ​ເຂົ້າ​ຮ່ວມ.

          ​ໃນໂອກາດນີ້, ​ທ່ານ ສົມ​ພູ ພົງສາ ຜູ້​ຊ່ວຍ​ລັດຖະມົນຕີ ກະຊວງສຶກສາທິການ ແລະ ກິລາ, ທັງ​ເປັນ​ຮອງ​ປະທານ ​ແລະ ​ເລຂາທິການ ຄອລ ​ໄດ້​ຜ່ານ​ບົດລາຍງານຜົນສຳ​​ເລັດ​ໃນ​ການ​ເຄື່ອນ​ໄຫວຈັດ​ຕັ້ງ​ປະຕິບັດ​ການ​ສົ່ງ​ເສີມ​ພັດທະນາ​ວົງ​ການ​ກິລາ​ລາວ ​ພ້ອມ​ທັງ​ມີ​ການ​ຂະຫຍາຍຕົວ​ອອກ​ຢ່າງ​ກວ້າງຂວາງ ​ແລະ ມີ​ຜົນສຳ​ເລັດ​ທີ່ພົ້ນ​ເດັ່ນຫຼາຍດ້ານ ​ໃນ​ການ​ເຂົ້າ​ຮ່ວມ​ແຂ່ງຂັນ​ກິລາ​ໃນ​ຂົ​ງ​ເຂດອາ​ຊຽນ ​ແລະ ​ເອ​​ເຊຍ ຄຽງ​ຄູ່​ກັບ​ການ​ສ້າງ​ບຸ​ຄະລາ​ກອນ​ຈາກ​ທ້ອງ​ຖິ່ນ ກ້າວ​ສູ່​ລະດັບ​ຊາດ ​ແລະ ສາກົນ. ຫຼັງ​ຈາກ​ນັ້ນ, ທ່ານ ນາງ ​​ແສງ​ເດືອນ ຫຼ້າ​ຈັນທະ​ບູນ ​ກໍ່​ໄດ້​ສະ​ແດງ​ຄວາມ​ຮູ້ສຶກ​ພາກພູມ​ໃຈ​ທີ່ໄດ້ຮັບການແຕ່ງຕັ້ງ​ໃຫ້​ຮັບ​ໜ້າ​ທີ່​ການ​ເປັນ​ປະທານ​ຄະນະ​ບໍລິຫານ​ງານ ຄອລ ຄົນ​ໃໝ່ ຂໍ​ໃຫ້​ເຊື່ອ​ໝັ້ນ​ວ່າ ​ເພື່ອ​ໃຫ້​ບັນລຸ​ເປົ້າ​ໝາຍ​ການ​ພັດທະ​ນາ​ກິລາ​ລາວ ກ້າວ​ສູ່​ໂອ​ແລມປິກສາກົນ ນັ້ນ ຕົນເອງ​ຈະ​ທຸ້ມ​ເທ​ສຸດ​ຄວາມ​ສາມາດ​ທັງ​ເຫື່ອ​ແຮງ ​ແລະ ສະຕິ​ປັນຍາ ​ເພື່ອສຸມ​ໃສ່​ສົ່ງ​ເສີມ​​ການພັດທະນາກິລາລາວ ໃຫ້​ບັນລຸ​ເປົ້າ​ໝາຍຢ່າງ​ມີຄຸນະພາ​ບ ​​ແລະ ມີ​ການ​ເຕີບ​​ໃຫຍ່​ຂະຫຍາຍຕົວ​ດີ​ຂຶ້ນ​ກວ່າ​ເກົ່າ ​ເພື່ອ​ເສີມ​ສ້າງ​ໃຫ້​ນັກ​ກິລາ​ມີ​ປະສົບ​ການ​ທີ່​ດີ​ເລີດ​ກ້າວ​ສູ່ຜົນສຳ​ເລັດ​ໃນ​ການ​ເຂົ້າ​ຮ່ວມງານ​ມະຫາ​ກຳ​ກິລາ​​ໂອ​ແລມປິກສາກົນ​ໃນ​ຕໍ່ໜ້າ.

ຄຽງ​ຄູ່​ກັນ​ນັ້ນ, ກໍ່ຈະ​ເຕົ້າ​ໂຮມ​ເອົາຜູ້​ທີ່​ມີ​ຄວາມ​ເສຍສະຫຼະ​ສູງ ​ເພື່ອພ້ອມ​ກັນ​ຈັດ​ຕັ້ງ​ກອງ​ທຶນ ທີ່​ຈະ​ຊ່ວຍ​ເປັນ​ໄມ້​ງັດ​ອັນ​ສຳຄັນ​ທີ່​ສຸດ​ເຮັດ​ໃຫ້ການ​ເຄື່ອນ​ໄຫວ​ຂະ​ບວນກິລາ​ໂອ​ແລມປິກ​ຂອງ​ລາວ ​ໄດ້​ມີ​ບາດກ້າວ​ໃໝ່​ທີ່​ມີ​ການ​ພັດທະນາ​ດີ​ຍິ່ງ​ຂຶ້ນ. ​ແນວ​ໃດ​ກໍ່ຕາມ, ຮຽກຮ້ອງ​ໃຫ້​ຄະນະ​ບໍລິຫານ​ງານ ຄອລ ຊຸດ​ໃໝ່ ທົບ​ທວນຄືນ​ກ່ຽວ​ກັບ​ແຜນ​ວຽກ, ແຜນ​ງານ​ ​ແລະ ​ແຜນການ​ຕ່າງໆ ໃຫ້​ມີ​ຄວາມ​ຊັດ​ເຈນ​​ໂປ່ງ​ໃສ ສອດຄ່ອງກັບ​ການ​ພັດທະນາ​ການ​ສຶກສາ ​ແລະ ກິລາ ​​ໃຫ້​ບັນລຸ​ເປົ້າ​ໝາຍ​ກັບແຜນງານຕ່າງໆ ​ໂດຍສະ​ເພາະ​ແຜນ​ພັດທະນາ​ກິລາ​ລາວ ​ແຕ່​ນີ້​ຮອດ​ປີ 2020 ​ໃຫ້​ປາກົດ​ຜົນ​ເປັນ​ຈິງ.

          ​ສຳລັບການ​ສ້າງ​ຕັ້ງ​ກອງທຶນ​ສົ່ງ​ເສີມ​ກິລາ​ລາວ​ ກ້າວສູ່​​ແລມປິກ​ສາກົນ​ນັ້ນ ກໍ່​ໄດ້​ມີ​ຫຼາຍ​ພາກສ່ວນ ແຈ້ງ​ເຈດ​ຈຳນົງ​ໃຫ້ການ​ສະໜັບ​ສະ​ໜູນ​ກອງ​ທຶນ​ດັ່ງກ່າວ ດ້ວຍ​ການ​ມອບ​ເງິນ​ສົ່ງ​ເສີມພັດທະນາ​ວົງ​ການ​ກິລາ​ລາວ ລວມມູນ​ຄ່າ 1,6 ຕື້​ກວ່າ​ກີບ, ​ໃນ​ນັ້ນ ກໍ່​ໄດ້​ມີ​ຄອບຄົວ​ຂອງ ທ່ານ ສີສະ​ຫວາດ ທິຣາວົງ ຊຸກຍູ້ 200 ລ້ານ​ກີບ ​ແລະ ທະນາຄານ ​ເອັສທີ ​ຫຼື ​ເອັສທີ ແບ໊ງ 200 ລ້ານ​ກີບ ​ເພື່ອ​ເປັນ​ການສະ​ແດງ​ຄວາມ​ຮູ້ບຸນຄຸນຕໍ່​ການ​ເສຍສະຫຼະ​ການ​ສະໜັບສະໜູນ​ດັ່ງກ່າວ ທາງ​ລັດຖະບານ ກໍ່​ຄື ກະຊວງ ສສກ ກໍ່​ໄດ້​ມອບ​ໃບ​ສົມ​ມະ​ນາ​ບຸນຄຸນ​ໃຫ້​ແຕ່ລະ​ພາກສ່ວນ​ທີ່​​ໃຫ້ການ​ອຸປະຖຳ.

ຄອລ

 ​ໂດຍ ອ້ວນ​ດຳ     

ນສພ ສຶກສາ-ກິລາເດືອນຫຼ້າສຸດ

ວາລະສານກິລາ

ໂທລະພາບ

ວິທະຍຸ

ວິທະຍຸກິລາ
102.pngBeerlao_Prime_Minister's_Cup.pngLao toyota.pngf889234799e865bbe90cee71f6cd2e53_L.pngfooterslide7.png